உனக்கான என் நந்தவனம்

உனக்கான என் பாதைகள்

அப்படியேதான் இருக்கின்றன

ஆனால்

நடந்து செல்ல பாதங்களைத்தான்

இன்னும் காணோம்

உனக்கான என் நந்தவனம்

அப்படியேதான் இருக்கிறது

ஆனால்

கொஞ்சிப் பேசும்

குரல் மொழிகளைத்தான்

இன்னும் காணோம்

உனக்கான என் இதயம்

அப்படியேதான் இருக்கிறது

ஆனால்

அதில் ஜீவனாய் இருந்த

உன் பிம்பங்களைத்தான்

இன்னும் காணோம்

கனவுகளெல்லாம்

நிஜங்களாகக் கூடாதாவென

நினைத்த காலங்கள் போய்

நிஜங்களெல்லாமே கனவுகளாய்ப் போன

ஒரு இலையுதிர்க் காலத்தின்

இறுதி நாட்களுக்குள்தான்

வாழ்ந்து கொண்டிருக்கிறோம்

நானும் உன் நினைவுகளும்.

	Tweet

மின்னாத மின்னல்

இடிக்காத இடிக்கு

பெய்யும் மழை

மின்னாத மின்னலுக்கு

பொழிகின்ற மேகம்

சொல்லாத சொல்லுக்கு

சுழல்கின்ற மனம்

விதிக்காத விதிக்கு

கதை கட்டும் மக்கள்

இப்படி

போலிகளால் நிரம்பிய

இந்த வாழ்க்கை நாடகத்தில்

மாறுவேடப் போட்டிக்கு மட்டும்

குவிகின்றன

கோடிக்கணக்கான விண்ணப்பங்கள்.

.

	Tweet

வேட்டை நாய்கள்

வெறிநாய்கள் வெளியில் இல்லை

உள்ளேயே இருக்கிறது

வேட்டை நாய்கள் புறத்தில் இல்லை

அகத்திலேயே இருக்கிறது

கடித்து கடித்து குதறி

கடைசியில்

தோல் கிழிந்து

நிர்வாணமாய் நிற்கும் போதுதான்

நிதர்சனம் உரைக்கிறது

இந்த பாழும் மனதுக்கு

முற்றின பிறகு

ஞானம் வந்து எதற்கு

இன்றே

இளமை இருக்கும் போதே

விஷம் வைத்து

நாய்களைச் சாகடி

முதுமையில்

உலகம் உன்னை நிமிர்ந்து பார்க்கும்.

.

	Tweet

சுய ஜெயம்

வானம் ஜெயிக்க

பூமி ஜெயிக்க

சந்திரனும் செவ்வாயும் ஜெயிக்க படித்த

இன்றைய தலைமுறைக்கு

சுயம் ஜெயிக்க

கற்றுக்கொடுக்காததால்

இமயத்தையே வெல்லும் இத்தலைமுறை

ஒரு சிறு ஏமாற்றத்துக்குக் கூட

ஈடுகொடுக்க முடியாமல்

தன் உயிரை

எமனுக்கு மொய் எழுதிவிடுகின்றது

உலகை ஜெயிக்கும் கல்வி மட்டுமல்ல

உள்ளத்தை ஜெயிக்கும் கல்வியும் அவசியமே.

(குறிப்பு: இது கவிதையா வசன கவிதையா புதுக்கவிதையா நவீனக் கவிதையா என்ற ஆராய்ச்சியை விட உள்ளம் கிழிக்கும் உண்மைகளைச் சொல்லத் துடிக்கும் ஒரு உள்ளத்தின் ஆதங்கம் வெளிப்படுத்தும் புது வடிவம்தான் இது என்பதே சரியாகும்)

.

	Tweet